Fjala e Kryetarit me rastin e 28 Nëntorit

Istog, më: 28.11.2008

I nderuar Komandant i trupave spanjolle të KFOR-it Kolonel Ortiz!
I nderuar Komandant i Policisë !
Të nderuar përfaqësues të TMK-ës!
Të nderuar Këshilltarë të Kuvendit të Komunës!
Të nderuara shoqatat të dala nga lufta e UÇK-ës!

Të nderuar mysafirë!

Me lejoni t’iu përshëndes dhe fillimisht t’iu uroj gjithë popullit shqiptarë kudo që gjenden 28 Nëntorin-Ditën e Flamurit, t’iu uroj dhe përgëzoj për këtë ditë historike e të lavdishme e cila i bashkon shqiptarët anëkend botës rreth flamurit kombëtar .

Duke rikujtuar gjithherë gjithë ato vuajtje e dhimbje, më se krenar festojmë sot ditën e Flamurit Kombëtar në Kosovën shtet të pavarur e sovran, për të parën herë gjatë historisë sonë, në Kosovën shtet tashmë të njohur ndërkombëtarisht nga vendet që kanë traditë shtet formuese dhe me demokraci të zhvilluar.

Patjetër se kemi obligim moral dhe institucional për të nderuar dhe kujtuar gjithë ata burra, djemë e bija që bënë sakrifica të mëdha për të ndërtuar këtë të ardhme të Kosovës, me emrat e të cilëve është shkruar historia e lavdishme e kombit tonë.Historikisht, jemi dëshmuar për kulturë qytetare e humane, jemi dëshmuar për traditën, guximin e fisnikërinë.Dhe të gjitha aktivitetet që nga historia e hershme nga koha e Skënderbeut, e deri në historinë më të re të shtetit të Kosovës, së fundi me luftën heroike të Ushtrisë Çlirimtare të Kosovës, është derdhur gjak, janë shuar me mijëra jetëra të shqiptarëve duke pasë gjithmonë në ballë si prijës e udhërrëfyes flamurin e Kombit.

Të nderuar të pranishëm!
Institucionet e Republikës së Kosovës, bashkë më popullin, jemi më se të vendosur që të ecim rrugës sonë të sigurt drejt integrimeve, për të vazhduar rrugën tonë në përmbushjen e standardeve më të larta europiane gjithmonë duke pasur parasysh respektimin dhe mbrojtjen e identitetit kombëtar të të gjitha etnive që jetojnë në Republikën e Kosovës, duke respektuar dhe mbrojtur vlerat më të larta njerëzore të secilit.

Padyshim se sakrifica e dëshmorëve të kombit dhe veprimtaria atdhetare e të gjithëve që kontribuan që sot të jemi shtet i pavarur dhe të festojmë të lirë festat tona kombëtare, na japin forcë e vullnet që të ecim edhe më tej drejt rrugës sonë të pashmangshme të anëtarësimit në Bashkësinë Europiane, Organizatën e Kombeve të Bashkuara dhe gjithë mekanizmave tjerë ndërkombëtarë.

Në këto ditë festive, jo rastësisht të emërtuara festat e Nëntorit, shprehim mirënjohjen dhe falënderimin tonë për gjithë miqtë tanë që kontribuan dhe të cilët do të na mbështesin edhe më tej në rrugëtimin tonë drejt së ardhmes, gjitha shtetet mike që ndihmuan në rindërtimin e Kosovës, në themelimin dhe forcimin e Institucioneve demokratike të Kosovës, vendet e Bashkimit Europian, SHBA dhe gjithë akterët tjerë kontribues të së sotmes dhe realitetit të krijuar në Republikën e Kosovës.Patjetër se duhet falënderuar trupat ushtarake të NATO-s, të cilët në mënyrë të sukseshme janë duke realizuar misionin e tyre për mbajtjen e sigurisë si dhe ruajtjes së paqës dhe stabilitetit përmes trupave të KFOR-it.
Të nderuar të pranishëm!
Jemi më se të vendosur dhe të përkushtuar që Institucionet e Republikës së Kosovës të sigurojnë dhe garantojnë një të ardhme të sigurtë drejt rrugëtimit të shtetit për anëtarësim në mekanizmat ndërkombëtar si dhe për të garantuar një mirëqenie më të mirë për gjithë qytetarët e Kosovës.
Lavdi dhe respekt gjithë Dëshmorëve të Kombit!
Urime Festat e Nëntorit!
Urime 28 Nëntori-Dita e Flamurit Kombëtar !

Fjala e Kryetarit me rastin e 28 Nëntorit

Lajme

Me te kerkuarit

Quick Links

Qyteti